Масъулини Думаи давлатии Русия шеваи назорати электронии муҳоҷиронро на танҳо масъалаи амният, балки масъалаи ҳифзи ҳуқуқи худи онҳо арзёбӣ мекунанд.
Дар назар аст, ҳаракати муҳоҷирон дар Русия тавассути профили рақамӣ барои ҳар як хориҷӣ назорат карда шавад.
Дар ин бора муовини раиси Думаи давлатӣ Сергей Неверов хабар дода, афзудаст, ки ин масъала бо сарвазири Русия, Михаил Мишустин баррасӣ шуд.
Корфармо бояд барои муҳоҷирати меҳнатӣ масъул бошад, яъне агар кормандро ҷалб намуд, бояд ӯро таъмин созад.
Агар аз кор озод карда шуд, дар ин бора мақомоти салоҳиятдор бояд фавран огоҳ карда шаванд, зарур хонд Неверов.
Вай гуфт:
“Профили рақамии шахсе, ки ба кор меояд, таъсис дода мешавад. Ӯ ба куҷо мекӯчад, иҷозатнома кай ба охир мерасад, дар куҷо зиндагӣ мекунад, бо кӣ. Ҳар гуна интиқол ба кори дигар – ҳама чиз бояд таҳти назорат бошад”.
Неверов таъкид намуд, ки ин на танҳо масъалаи амният нест, балки масъалаи эҳтироми ҳуқуқи худи муҳоҷирони корӣ низ аст.
Қаблан раиси Кумитаи меҳнати Думаи давлатии Русия Ярослав Нилов масъалаи шартномаҳои кориро ба миён гузошт, ки бояд кӯтоҳмуддат баста шаванду дар сурате агар корманд аз корфармо қаноатманд бошад, метавонад шартномаро тамдид кунад.
Вай афзуд, ки муҳоҷирати корӣ дар Русия бояд тибқи дархост – “ба як минтақаи мушаххас, мутахассисони мушаххас” сурат гирад.
Дар соли 2023 дар Маскав пулис 224 ҳазор нақзи қонуни муҳоҷиратро ошкор кардааст.
Чунин маълумот аз гузориши видеоии Сарраёсати Вазорати корҳои дохилии пойтахт дар Думаи шаҳри Маскав бармеояд.
Дар ҳамин ҳол, алайҳи 42 ҳазор муҳоҷир дар бораи ихроҷ аз Русия тасмим гирифта шудааст, ки 11 ҳазор нафари онҳо дар боздоштгоҳи муваққатӣ ҷойгир шудаанд.
Зимнан, Олег Баранов, сардори Сарраёсати Вазорати корҳои дохилии пойтахт, гуфт, дар соли 2023 дар Маскав шумораи ҷиноятҳои аз ҷониби шаҳрвандони хориҷӣ ва шахсони бешаҳрванд содиршуда 5,1% коҳиш ёфта, шумораи ҳуқуқвайронкунии маъмурӣ 3,8% афзоиш ёфтааст.
Соли гузашта дар Маскав пулис беш аз 23 ҳазор мавриди нақзи қонуни муҳоҷиратро сабт кардааст.
Олег Баранов, сардори раёсати пойтахт гуфт: “Танҳо дар ҷараёни амалиёти “Нелегал” беш аз 23 ҳазор қонуншикании муҳоҷират ошкор карда шуда, зиёда аз 3,6 ҳазор қарор оид ба ихроҷи маъмурии шаҳрвандони хориҷӣ аз Русия барои нақзи гуногуни қонунгузории ҷорӣ қабул гардид”.
Вай ҳамчунин таъкид кард, ки дар соли гузашта теъдоди фактҳои ошкоршудаи сабти номи қалбакии шаҳрвандони хориҷӣ барои сабти номи муҳоҷират тақрибан 30 % афзоиш ёфтааст.
Кормандони ситод беш аз 158 ҳазор ҳодисаи аз ҷониби шаҳрвандони хориҷӣ вайрон кардани қоидаҳои вуруд ё будубош ба қаламрави Федератсияи Русияро боздоштанд. Теъдоди фактҳои ошкоршудаи бақайдгирии қалбакии шаҳрвандони хориҷӣ дар ҷои будубоши онҳо қариб 30% афзоиш ёфтааст, шарҳ дод Баранов.
Вай афзуд, танҳо соли гузашта барои ташкили муҳоҷирати ғайриқонунӣ 140 парвандаи ҷиноӣ боз шудааст.