Ду омӯзгори тоҷик аз Донишгоҳи давлатии ҳуқуқ бизнес ва сиёсати Тоҷикистон дар озмуни илмӣ миёни кишварҳои ИДМ беҳтарин дониста шуданд.
Омӯзгорони Донишгоҳи давлатии ҳуқуқ бизнес ва сиёсати Тоҷикистон дар шаҳри Хуҷанд Аълохон Бобозода ва Мавлуда Асророва дар номинатсияҳои озмуни илмӣ миёни кишварҳои Иттиҳоди Давлатҳои Мустақил сазовори ҷои аввал шуданд
Дар бораи ин навиди илмӣ масъули матбуотии ДДҲБСТ дар Хуҷанд Сино Ғафурӣ ба Sputnik Тоҷикистон иттилоъ дод.
Бино ба гуфти манбаъ озмуни мазкур, моҳи ноябри соли 2023 дар шаҳри Остонаи Қазоқистон байни мутахассисони муассисаҳои илмӣ-таълимии кишварҳои узви ИДМ баргузор гардид.
Ғафурӣ афзуд:
“Дар ин озмуни бонуфузӣ сатҳи байналмиллалӣ намояндагон аз тамоми муассисаҳои илмӣ-таълимии давлатҳои ИДМ онлайн иштирок намудаанд. Боиси фараҳмандӣст, ки зимни натиҷагирӣ аъзои ҳакамон мақолаҳои илмии омӯзгорони мо Бобозода ва Асророваро беҳтарин арзёбӣ карда сазовори ҷойи аввал донистаанд”.
Бино ба арзёбии ҳакамони озмун ба Аълохон Бобозода, ҷоизаи “Беҳтарин муҳаққиқ” ва ба Мавлуда Асророва ҷоизаи “Беҳтарин корманди илмӣ” и ИДМ дар соли 2023 тақдим намудаанд.
Бобозода омӯзгори факултаи технологияҳои инноватсионӣ ва баҳисобгирии бухгалтерии ва Асророва мудири шуъбаи магистратура, омодакунии кадрҳои илмӣ ва илмӣ-педагогии Донишгоҳи давлатии ҳуқуқ, бизнес ва сиёсати Тоҷикистон (ДДҲБСТ) дар шаҳри Хуҷанд мебошанд.
Аълохон Бобозода аъзои “Лигаи зиёиён” International Committee on Intellectual cooperation (ICIC) -и Академияи илмҳои табии Русия ва дорандаи Медал ва Сертификати бузургдошти Леонардо да Винчӣ аст.
Сино Ғафурӣ гуфт, рӯзи гузашта ба ифтихори дастоварди илмии ин ду омӯзгор аз ҷониби Раёсати донишгоҳ маҳфили илмӣ – маърифатӣ баргузор гардида дар вазъияти тантанавӣ ба ғолибони озмуни илмии ИДМ, Дипломи дараҷаи l, нишони сарисинагӣ ва шаҳодатнома супорида шуд.