Русия дар созмони Иттиҳодияи Давлатҳои Мустақил (ИДМ) раёсатро бар уҳда гирифт ва дар ин муддат мехоҳад нуфузи ин созмонро пурзур намояд.
Аз рӯзи 1 январ Русия раёсати Иттиҳоди Давлатҳои Мустақилро бар уҳда гирифт.
Маскав яке аз вазифаҳои асосии худ дар соли ояндаро таҳкими нуфузи созмон ва робита бо иттиҳодияҳои минтақавӣ, инчунин муборизаи муштарак ба чолишҳои беруна медонад.
Ёдовар мешавем, ки соли 2023 Қирғизистон дар ИДМ раёсат мекард. Ба гуфтаи Владимир Путин, раисҷумҳури Русия, ин кишвар дар тӯли як сол фаъолона кор кард ва Маскав ният дорад дар ҳамоҳангии зич бо раёсати пешин амал кунад.
Дар нақши худ, Русия ба чанд бахш таъкид мекунад. Ба гуфтаи Путин, дар соҳаи иқтисод корҳои гузариши фаъолтар ба пули миллӣ дар ҳисоббаробаркуниҳои мутақобила идома хоҳанд ёфт, чун он имкон медиҳад соҳибихтиёрии иқтисодӣ ва молиявии давлатҳо боэътимодтар таъмин карда шавад.
Илова бар ин, раисиҷумҳури Русия ҳамкориҳои муштаракро дар мубориза бо терроризму ифротгароӣ, ҷиноятҳои фаромарзӣ, қочоқи маводи мухаддир ва фасод муҳим арзёбӣ кард.
Таваҷҷуҳи раёсати Русия ҳамчунин ба густариши равобити фарҳангӣ ва башардӯстона, ҳамкорӣ дар бахшҳои тандурустӣ, илм, маориф ва варзиш хоҳад буд.
Русия дар ин давра дар бораи “таъмини ҳамоҳангсозии равандҳои ҳамгироӣ дар фазои ИДМ” зикр кард. Сухан дар бораи ҳамкории мутақобила бо СПАД ва СҲШ дар бахши амният ва бо ИИАО дар бахши иқтисодӣ низ таъкид кардааст.
Дипломатҳо дар ҷаласае дар Вазорати корҳои хориҷии Тоҷикистон натоиҷи асосии соли гузаштаро ҷамъбаст намуда, вазифаҳои давраи ояндаро баррасӣ карданд.
Муносибатҳои дуҷониба ва бисёрҷониба бо кишварҳои ИДМ барои Тоҷикистон авлавият доранд.
Дар ин бора Сироҷиддин Муҳриддин, вазири умури хориҷии Тоҷикистон, дар мулоқот бо сафирони Русия, Озарбойҷон, Беларус, Қазоқистон ва Узбекистон изҳор дошт, хабар медиҳад Вазорати корҳои хориҷии ҷумҳурӣ.
Дар хабар омадааст:
“Дар рафти мулоқот роҳбари Вазорати корҳои хориҷии Тоҷикистон таъкид кард, ки рушди босуръати муносибатҳои дуҷониба ва бисёрҷониба бо Боку, Минск, Остона, Маскав ва Тошканд афзалияти сиёсати хориҷии Тоҷикистон мебошад”.
Қаблан дар шаҳри Санкт-Петербург нишасти ғайрирасмии раҳбарони кишварҳои узви ИДМ баргузор шуд, ки дар он раисиҷумҳури Тоҷикистон Эмомалӣ Раҳмон ширкат дошт.
Тибқи анъана, раиси Федератсияи Русия Владимир Путин ҳамкорони худро дар остонаи Соли нав ба пойтахти шимолӣ даъват карда буд.
Роҳбарони ИДМ дар нишасти ғайрирасмӣ натиҷаҳои солро ҷамъбаст карданд.