Сироҷиддин Муҳриддин, вазири корҳои хориҷа аз вохӯрии машваратии сарони давлатҳои Осиёи Марказӣ дар ояндаи наздик хабар додааст.
Сарони давлатҳои Осиёи Марказӣ рӯзҳои 14-15-уми сентябр бори панҷум дар шаҳри Душанбе бо ҳам мулоқот мекунанд. Ба гуфтаи вазир, ин нишасти сатҳи баланд таҳти раёсати раисиҷумҳури Тоҷикистон баргузор мешавад ва ҳоло онҳо барои ин вохӯрӣ ҳамаҷониба омодагӣ мебинанд.
Сироҷиддин Муҳриддин таъкид кард: “Бо мақсади дар сатҳи баланд ва шоиста баргузор намудани ин нишаст мо бо кишварҳои Осиёи Марказӣ дар ҳамкории доимӣ қарор дошта, ҳаматарафа омодагӣ мегирем”.
Вазир иброз дошт, ки дар ҷаласаи машваратии сарони давлатҳои Осиёи Марказӣ бо пешниҳоди Тоҷикистон аз рӯи натиҷаҳои он як баста санадҳо ба имзо хоҳанд расид, ки муҳимтарини он Эъломияи ҷамъбастии сарони давлатҳо ҳисобида мешавад.
Инчунин, гуфта мешавад, дар Душанбе ду созишномаи муҳим дар соҳаҳои нақлиёти заминӣ ва сиёсати ҷавонон ба имзо мерасанд. Ҳамзамон, дар дигар соҳаҳо имзои санадҳо дар назар аст.
Вазири корҳои хориҷа гуфт: “Тоҷикистон ҳамчунин пешниҳод намудааст, ки дар ҳошияи ҷаласаи панҷуми машваратии сарони давлатҳои Осиёи Миёна 12 чорабинии канорӣ гузаронида шавад. Баргузории форуми иқтисодӣ, форуми олимон, мулоқоти занони фаъол, барномаи фарҳангӣ ва намоишгоҳи таомҳои миллии панҷ давлати минтақа аз ҳамин ҷумла аст”.
Дар ин баробар, дар Душанбе баргузории ҷаласаи навбатии Шӯрои сарони давлатҳои Фонди байналмилалии наҷоти Арал ба нақша гирифта шудааст.
Гуфта мешавад, ки ҳоло Тоҷикистон раисии ин Фонди байналмилалиро ба ӯҳда дорад ва дар чаҳорчӯбаи ин ҷаласа якчанд қарорҳои ниҳоят муҳим бояд дар Душанбе ба имзо расанд.
Дар нишасти сарони давлатҳои Осиёи Марказӣ бар замми мизбони он, иштироки раисиҷумҳурҳои Қазоқистон, Қирғизистон, Туркманистон ва Ӯзбекистон дар назар аст.
Бояд гуфт, ки мулоқоти чоруми сарони давлатҳои Осиёи Миёна ахиран дар Қирғизистон баргузор гардида буд.
Ёдовар мешавем, ки вохӯрии машваратии сарони давлатҳои Осиёи Марказӣ аввалин маротиба соли 2018 дар шаҳри Остонаи Қазоқистон баргузор гардида, минбаъд соли 2019 дар шаҳри Тошканди Ӯзбекистон, соли 2021 дар шаҳри Авазаи Туркманистон ва соли 2022 дар шаҳри Чолпон – Отаи Қирғизистон сурат гирифта буд.