Дирӯз Аҳмади Масъуд баъди ҳамлаҳои густардаи Толибон бар Панҷшер ва тасарруф кардани бахше аз вилоят, дар як паёми савтӣ аз мардуми Афғонистон хост, ки алайҳи Толибон қиём кунанд, зеро дар ҳамлаи Толибон бар Панҷшер неруҳои вижаи Покистон ва паҳпод (ҳавопаймоҳои бесарнишин)-и ин кишвар низ Панҷшерро бомбаборон кардаанд.
Алӣ Майсам Назарӣ, масъули равобити хориҷии Ҷабҳаи муқовимати миллӣ дар Панҷшер, навиштааст, ки баъди фарохонӣ (даъват)-и раҳбари Муқовимати миллӣ дар кишвар хезишҳои саросарӣ садо баланд кардаанд ва инро фасли ҷадиде аз муборизаи мардуми Афғонистон донистааст.
“Аз ваҷаб-ваҷаб хоки сарзамини озодагон садои озодӣ, адолат ва ҳайҳоти миназзулиҳи баланд шудааст. Ин фасли ҷадиде аз таърихи муборизаҳои мардуми мост ва ин бор чунон лашкари ҷаҳлу таассуб шикаст бихурад, ки ҳаргиз дигар сар боло карда натавонад. Ҷабҳаи муқовимати миллӣ танҳо пирӯзиро қабул дораду бас!”,-навиштааст Назарӣ.
Дар шабакаҳои иҷтимоӣ садҳо корбари аз Афғонистон ва гӯшаҳои дигари ҷаҳон шаби 6 ба 7-уми сентябр наворҳо аз қиёмҳои мардумиро коридаанд ва ҳамрайъии худро бо даъвати Аҳмади Масъуд эълом кардаанд.
Гуфта мешавад, ки дар ин хезишҳо бештар занон фаъол будаанд. Саҳфаи Ҷабҳаи муқовимати миллӣ дар саҳфаи Твиттараш аз занони эътирозгари Кобул, Булх, Бомиён, Дойкундӣ ва Ҳирот ташаккур кардааст.
То кунун вокуниши расмии Толибон ба ин қиёмҳо маълум нест, аммо бархе аз тазоҳуроткунандагон дар шабакаҳои иҷтимоӣ навиштаанд, ки неруҳои Толибон онҳоро пароканда кардаанд ва лайҳашон аз зӯру хушунат низ кор гирифтаанд.