Ҳадаф аз пурзӯр шудани кор бо муҳоҷирони меҳнатӣ ин пешгирӣ кардан аз шомилшавии онҳо ба ҳар гуна гурӯҳҳои ифротӣ рабт дода мешавад.
Мақомоти Тоҷикистон корҳои фаҳмондадиҳиро бо муҳоҷирони корӣ ҷиҳати ҷилавгирӣ аз шомилшавии онҳо ба ҷомеаҳои ифротгаро дар кишварҳои мухталиф, аз ҷумла Русия ва дохили Тоҷикистон пурзӯр мекунад.
Дар ин бора ТАСС бо такя ба муовини вазири меҳнат Шаҳноза Нодирӣ хабар дод.
Зикр гардид, ки чунин тадбир пас аз ҳамлаи террористӣ ба Крокус Сити Хол, ки шаҳрвандони Тоҷикистон аз гумонбарони асосӣ номбурда мешаванд, рӯи даст гирифта шуд.
Вай гуфт:
“Ҳоло мо кори худро пурзӯр кардем, 23 март бо супориши вазир ба намояндагии Вазорати меҳнат оид ба масъалаҳои муҳоҷират дар Русия ҷиҳати пурзӯр намудани кор оид ба пешгирии шомилшавӣ ба ҷомеаҳои ифротӣ мактуб ирсол гардид. Кор тавассути сохторҳои хадамоти муҳоҷират, ки дар тамоми минтақаҳо намояндагӣ мекунанд, тақвият дода шуд”.
Муовини вазир қайд кард, ки ба пешгирии ҷалби кадрҳо тавассути шабакаҳои иҷтимоӣ диққати махсус дода мешавад.
Вай афзуд, дар кишварҳои дигар, ки шаҳрвандони Тоҷикистон зиндагӣ мекунанд ва диаспораҳо ташкил шудаанд, низ кор идома дорад.
Ҳамла ба толори консертии Крокус Сити Холл шоми 22 март рух дод. Чанд нафар ба бино зада даромада, ба сӯи одамон тир холӣ карданд.
Онҳо инчунин дар чанд ҷой оташ задаанд, дар натиҷа бом фурӯ рехта, толори тамошо комилан сӯхтааст.
Дар робита ба ин ҳодиса аз рӯи моддаи “ҳамлаи террористӣ” парвандаи ҷиноӣ боз шудааст.
Ҷинояткорон субҳи барвақти 23 март дар вилояти Брянск боздошт шуданд. Онҳо шаҳрвандони Тоҷикистон буда, хостанд ба Украина фирор кунанд.
Додгоҳи Басмании Маскав онҳоро то 22 май ба ҳабс фиристод. Дар маҷмӯъ дар ин парванда 11 нафар боздошт шудаанд.
Масъулини Думаи давлатии Русия шеваи назорати электронии муҳоҷиронро на танҳо масъалаи амният, балки масъалаи ҳифзи ҳуқуқи худи онҳо арзёбӣ мекунанд.
Дар назар аст, ҳаракати муҳоҷирон дар Русия тавассути профили рақамӣ барои ҳар як хориҷӣ назорат карда шавад.
Дар ин бора муовини раиси Думаи давлатӣ Сергей Неверов хабар дода, афзудаст, ки ин масъала бо сарвазири Русия, Михаил Мишустин баррасӣ шуд. Идомаи матлаб дар …