Ба гузориши ТоҷикПресс, Низомиддин Зоҳидӣ, Сафири Тоҷикистон дар Эрон дар маросими “Шаби мероси фарҳангии Эрону Тоҷикистон” бо таъкид бар ин ки тавсеаи равобит бо Эрон яке аз авлавиятҳои Тоҷикистон аст, сатҳи равобити сиёсии Душанбе ва Теҳронро низ олӣ тавсиф кард ва се сафари президентҳои Тоҷикистону Эрон ба кишварҳои матбуъ дар се соли ахирро нишонаи ин равобити хуб донист.
Сафири Тоҷикистон дар Теҳрон афзуд: Баргузарии рӯйдодҳои фарҳангии муштарак байни Душанбе ва Теҳрон ду хубӣ дорад. Аввал ин ки огоҳӣ аз мероси фарҳангӣ ба миллатҳои мо ин имконро медиҳад, ки бар дастовардҳои фарҳангии ниёкони худ такя кунанд ва ин меросро дар хизмати замони ҳол қарор диҳанд ва масири пешрафти ояндаи худро мушаххас кунанд. Сониян муаррифии дастовардҳои фарҳангии муштарак дар сатҳи ҷаҳониро мумкин медонем.
Низомиддин Зоҳидӣ бо ишора ба ин ки Тоҷикистон токунун 10 мероси фарҳангиро дар созмони ЮНЕСКО ба сабт расонидааст, гуфт: Аз ин теъдод 4 меросро ҳамроҳ бо Эрон сабт мекунем.
Вай гуфт: Бо тавваҷуҳ ба ин ки бисёре аз мазоҳири мероси фарҳангии Эрону Тоҷикистон яксон аст, пешниҳод мекунам кумитаи муштараки Эрону Тоҷикистон барои ёфтан ва сабти мероси муштарак дар ЮНЕСКО ташкил шавад.
Эрону Тоҷикистон забони муштарак ва пайвандҳои таърихии муштарак доранд
Хусравипаноҳ, дабири Шӯрои олии инқилоби фарҳангии Эрон дар идомаи ин маросим гуфт: Ду кишвар забону пайванди таърихии муштарак доранд ва забони форсӣ низ боиси пайванди андеша ва ҳикмат байни ду миллат шудааст.
Вай таъкид кард: Забон ҳомили фарҳанг аст ва дар канори фарҳанг, ҳикмат, дониш ва фазилатро низ мунтақил мекунад. Ба ҳамин далел эрониёну тоҷикҳо пайвандҳои амиқу пинҳонӣ доранд.
Хусравипаноҳ забони форсиро забоне дорои ҳикмат хонду гуфт: Ба ҳамин далел аст, ки нависандагону шоирони мо ҳамеша аз ҳикмат гуфтаанд ва мо Рӯдакӣ ва Фирдавсиро ҳаким Рӯдакӣ ва ҳаким Фирдавсӣ меномем.