Кумитаи кор бо занон ва оилаи ҷумҳурӣ зимни нишасти матбуотияш дар Душанбе хабар медиҳад: Теъдоди талоқ дар кишвар сол то сол афзоиш меёбад.
Ба иттилои ин ниҳод, аз аввали соли 2022 (дар давоми 6 моҳ) дар кишвар беш аз 30,2 ҳазор издивоҷ ба қайд гирифта шудааст.
Дар мавриди талоқ бошад, шумораи он дар шаш моҳи аввал ба 7,2 ҳазор ҳолат расидааст.
Ин нишондиҳанда назар ба ҳамин давраи соли гузашта қариб 790 адад зиёд аст. Тибқи омор он замон дар кишвар 6,4 ҳазор чунин ҳодиса ба қайд гирифта шуда буд.
Илова бар ин, ниҳоди мазкур сабабҳои маъмултарини пароканда шудани оилаҳоро номбар кард, ки аз ин қабил аст:
муҳоҷирати корӣ;
бемории яке аз ҳамсарон;
бефарзандӣ;
зӯроварӣ дар оила.
Илова бар ин, бисёре аз ҷуфтҳо гуфтаанд, ки ба далели номувофиқ будани аъзои хонавода, дахолати шахсони сеюм ва ҳатто гирифтани шаҳрвандии Русия, маҷбуранд, ин муносибатро қатъ кунанд.