Дар ин вохӯрӣ гурӯҳҳои кории топографӣ ва гурӯҳҳои корӣ оид ба масъалаҳои ҳуқуқии ҳайатҳо ширкат карда, он дар фазои дӯстӣ гузаштааст.
Даври навбатии музокироти ҳайатҳои Тоҷикистону Қирғизистон оид ба делимитатсия ва демаркатсияи сарҳади давлатӣ доир шуд.
Ба гузориши Кумитаи давлатии амнияти миллии Тоҷикистон он дар асоси мувофиқаи бадастомадаи рӯзҳои 21-27 январи соли 2024 дар шаҳри Бӯстони Тоҷикистон доир шуд.
Гуфта мешавад, ки дар ин дидор, ҷонибҳо дар минтақаҳои боқимондаи сарҳади давлатии Тоҷикистон ва Қирғизистон корҳои саҳроӣ баргузор намудаанд.
Манбаъ афзудааст:
“Ба мувофиқа расиданд, ки корҳоро дар вохӯрии навбатӣ, ки дар ҳудуди Ҷумҳурии Қирғизистон баргузор мегардад, идома диҳанд”.
Дар ин вохӯрӣ гурӯҳҳои кории топографӣ ва гурӯҳҳои корӣ оид ба масъалаҳои ҳуқуқии ҳайатҳо ширкат кардаанд.
Таъкид шудааст, ки вохӯрӣ дар фазои дӯстӣ ва ҳамдигарфаҳмӣ баргузор шуд.
Маврид ба зикр аст, ки дар доираи музокироти шашрӯза дар вилояти Суғд мулоқоти навбатии ҳамраисони ҳайатҳои ҳукуматии Тоҷикистон ва Қирғизистон дар бораи делимитатсия ва демаркатсияи сарҳади давлатии ду кишвар Саймумин Ятимов ва Қамчибек Тошиев баргузор гардид.
Дар дидор онҳо ба гурӯҳҳои дахлдори ҷонибҳо оид ба тақсимоти марз, барои идома додани кор дар самти минбаъд муайян намудани гузариши хати сарҳади ҳарду давлат дар минтақаҳои боқимонда супоришҳои дахлдор доданд.
Ёдовар мешавем, ки дар гуфтушуниди гузашта, ки дар ҳудуди Бодканд анҷом шуда буд, ҷонибҳо беш аз 38 км марзро мувофиқа карданд.
Тарафҳо қайд карда буданд, ки корро оид ба тавсифи минтақаҳои боқимонда дар вохӯрии навбатӣ, ки дар ҳудуди Тоҷикистон баргузор мешавад, идома хоҳанд дод.
Дар оғози ин музокирот, ки раиси КДАМ Тоҷикистон, Саймуъмин Ятимов ва ҳамтои тоҷикаш, Қамчибек Тошиев иштирок доштанд, ба вусъати ҳамкорӣ таъкид гардид.
Ятимов гуфт, бо Қирғизистон дар самтҳои ҳаётан муҳим созиш шуд. Дар масоили марзӣ дар самтҳои Қулунду, Мақсад, Арка ва роҳи Хистеварз тавофуқ ҳосил гардид, изҳор дошт раиси КДАМ Тоҷикистон баъди мулоқот бо ҳамтои қирғизаш дар Бодканд. Тавофуқ ҳосил шуд, протокол таҳия гардид, афзуд ӯ.
Тоҷикистону Қирғизистон беш аз 970 километр марзи муштарак доранд ва то ҳанӯз чандсад километри он таъйин ва аломатгузорӣ нашудааст.
Гурӯҳҳои кории байниҳукуматӣ талош доранд, марзи боқимондаро бо дарназардошти ҳифзи манофеи дуҷониба таъйин ва аломатгузорӣ кунанд. Мулоқоти ҷонибҳо бо навбат дар қаламрави тарафайн баргузор мегарданд.
Имомқули Тасмагамбатов, Дабири кулли Созмони Паймони Амният Дастаҷамъӣ гуфт: Аъзои Созмони Паймони Амнияти дастаҷамъӣ итминон доранд мавзӯи ихтилофоти марзии Тоҷикистону Қирғизистон дар ояндаи наздик ҳал хоҳад шуд ва пешрафтҳои назаррасе дар ин росто вуҷуд дорад.
Вай хотирнишон кард: Сарони кишварҳо бо ишора ба пешрафтҳои суратгирифта ибрози итминон карданд ин мушкил дар ояндаи наздик ҳал хоҳад шуд.
Ба гуфта дабири кулли СПАД пешрафти қобили мулоҳиза дар ҳали масаълаи марзӣ байни ин ду кишвар як омили муҳиму мусбат барои кулли минтақа ба ҳисоб меравад.
Тасмагамбатов таъкид кард: Руасои ҷумҳури Тоҷикистону Қирғизистон эълом карданд, ки барои ҳалли ин мавзӯъ ҳеҷ ҷойгузине ҷуз равишҳои сиёсӣ ва дипломатик нест ва бар асоси он камиссиюнҳои давлатӣ ташкил шудаанд, ки ба таври муназзам ҷаласа мегузоранду мушкилоти бахшҳои мавриди ихтилофи марзро ҳал мекунанд.
Дабири кулли СПАД афзуд: Фикр мекунам дар ояндаи наздик шоҳиди пешрафти бисёр хубе дар ин замина бошем.
Александр Лукашенко, раисҷумҳури Беларус низ ба ин мавзӯъ ишора карда гуфт: Мо аз пешрафти бисёр хуб байни руасои ҷумҳури ин ду кишвар дар марзи муштаракашон истиқбол мекунем.
Лозим ба зикр аст, ки оқилбек Ҷабборов, нахуствазири Қирғизистон пештар эълом карда буд ҳар ду тараф хоҳони ҳалли мушкили марзӣ то поёни соли 2023 ҳастанд.
Тӯли марзи ду кишвар 972 километр аст. Пеш аз ин гузориш шуда буд, ки ҳудуди 290 километр таъин нашуда, боқӣ мондааст. Пас аз имзои протоколи шумораи 44, раванди тавофуқ бар сари бахшҳои марзӣ суръати қобили таваҷҷуҳе ёфтааст.