Дар дидори вазирони умури хориҷаи кишварҳои Осиёи Марказӣ дастури кори панҷумин нишасти машваратии сарони кишварҳои минтақа, ки дар шаҳри Душанбе баргузор хоҳад шуд, мавриди баррасӣ ва тавофуқ қарор гирифт.
Дар ин дидор дар бораи заминаҳои тавсеаи ҳамкориҳои муштараки кишварҳои Осиёи Марказӣ дар заминаҳои мухталиф ва ҳамчунин масоили муҳими минтақаӣ ва байналмилалӣ табодули назар анҷом гирифт.
Дар нишасти сарони Осиёи Марказӣ мавзӯъоти мухталиф ва ба хусус фурсатҳо ва чашмандози таомулоти сиёсӣ, иқтисодӣ, фарҳангӣ ва башардӯстонаи минтақаӣ мавриди баҳс ва баррасӣ қарор хоҳад гирифт.
Дар поёни ин нишаст қарор аст баёнияи муштараки сарони Осиёи Марказӣ, тавофуқнома дар мавриди тавсеаи ҳамлу нақли заминии минтақаӣ, тавофуқнома дар мавриди сиёсати ҷавонон, муқаррароти шӯрои ҳамоҳангкунандагони миллии нишастҳои машваратии сарони Осиёи Марказӣ ва «нақшаи роҳ» дар мавриди ҳимоят аз беҳдошт ва саломати ҷинъият дар Осиёи Марказӣ барои солҳои 2023-2025 ба имзо бирасад.
Шоёни зикр аст, ки ҳамчунин дар шаҳри Душанбе нахустин иҷлоси вазирони ҳамлу нақл минтақа доир шуд, ки дар поёни он эъломияи муштарак ба имзо расид. Дар ин эъломия бар зарурати тақвияти ҳамкориҳои ҳамлу нақлӣ, транзитӣ ва лоҷестикӣ байни кишварҳои Осиёи Марказӣ ва ҳамчунин бо соири кишварҳо таъкид шудааст.
Гуфта шудааст, ки густариши таомулот дар заминаи ҳамлу нақл ва ба хусус эҷоди диҳлезҳои ҳамлу нақли чандваҷҳӣ сабаби беҳбуди равобит ва наздикии кишварҳо шуда ва ба равнақи иқтисод ва тиҷорати минтақаӣ ва байналмилалӣ кумак хоҳад кард.
Дар ҳошияи нишасти сарони минтақа ҳамчунин чандин барномаҳои дигар, аз ҷумла ҳамоиши иқтисодии минтақаӣ, нишасти руасои донишгоҳҳои минтақа, нишасти пажӯҳишгарони минтақа, ҳамоиши ҷавонони минтақа, намоишгоҳи тавлидкунандони Осиёи Марказӣ, намоишгоҳи наққошии минтақа, намоиши ғизоҳои миллии минтақа ва ғайра анҷом хоҳад шуд.
پایان پیام/ح