Раиси парлумони Озарбойҷон ваъда додааст, ки аз тамоми имконот ва маҳорату донишаш барои таҳкими ҳамкорӣ бо Тоҷикистон истифода хоҳад кард.
Муҳаммадато Султонов, котиби матбуотии Маҷлиси намояндагон гуфтааст, ки дар шаҳри Душанбе рушди муносиботи байнипарлумонӣ ва ҳамкории сиёсӣ баррасӣ шуд.
Тибқи иттилои манбаъ ахиран дар бинои парлумони кишвар дидори раиси Маҷлиси намояндагони Маҷлиси Олии Тоҷикистон Маҳмадтоир Зокирзода бо Раиси Милли Меҷлиси Ҷумҳурии Озарбойҷон Соҳиба Ғаффорова, ки бо сафари расмӣ дар Душанбе қарор дорад, сурат гирифт.
Қайд карда шудааст, ки дар ин мулоқот масъалаи тақвияти ҳамкории Тоҷикистон ва Озарбойҷон дар ҳамаи заминаҳо, аз ҷумла муносиботи байнипарлумонӣ, ҳамкории сиёсӣ, иқтисодӣ, кишоварзӣ, фарҳангӣ ва дигар мавзӯъҳо баррасӣ гардиданд.
Маҳмадтоир Зокирзода дар ин дидор зикр кардааст, ки фаъолият доштани гурӯҳҳои дӯстӣ ва ҳамкорӣ дар парлумонҳои ду кишвар заминаи хуберо барои таҳкими ин муносибот ба вуҷуд меорад.
Зокирзода гуфт: “Боздиди ҳайатҳои парлумонии Тоҷикистон ва Озарбойҷон аз мамлакатҳои ҳамдигар низ барои истифода аз таҷрибаи якдигар дар самти таҳия ва қабули қонун ва дигар санадҳои дорои аҳамияти минтақавӣ ва байналмилалӣ кумак хоҳад кард”.
Дар ҳамин ҳол, Соҳиба Ғаффорова изҳор доштааст, ки ӯ ба мардум ва миллати тоҷик назари нек дорад ва ба ҳайси Раиси парлумони Озарбойҷон аз тамоми имконот ва маҳорату дониши худ барои таҳкими ҳамкорӣ бо Тоҷикистон истифода менамояд.
Дар ин мулоқот ҷонибҳо изҳори умедворӣ карданд, ки муносибати ду давлат дар ҳамаи соҳаҳо густариш ёфта, маҷрои нав касб мекунад.