Мақомоти Тоҷикистон ва Русия мавзуи пайвастани Душанбе ба тарҳи интиқоли фаврии маҳсулоти кишоварзӣ ба қаламрави Иттиҳоди иқтисодии АвруОсиёро мавриди баррасӣ қарор доданд.
Алифтино Крилова, яке аз масъули ин тарҳ эълом кард, ки дар сурати пайвастани Тоҷикистон ба ин тарҳ, замони интиқоли маҳсулоти кишоварзии ин кишвар ба қаламрави Иттиҳоди иқтисодии АвруОсиё кӯтоҳ ва ҳазинаҳои ҳамлу нақл низ коҳиш хоҳад ёфт.
Вай бо ишора ба муомилоти маҳсулоти кишоварзии Тоҷикистон ва Русия дар соли 2021 ба арзиши молии 300 миллион доллар эълом кард, ки заминаи афзоиши ин нишондод вуҷуд дорад.
Ба далели пайвастани Узбакистон ба ин тарҳ, ронандагони тоҷикистонӣ метавонанд маҳсулоти кишоварзии ин кишварро то роҳи оҳани Узбакистон мунтақил кунанд.
Дар идома ин маҳсулот тавассути қатор ба кишварҳои узви Иттиҳоди иқтисодии АвруОсиё мунтақил хоҳад шуд.
Гуфта мешавад, ки мақомоти Тоҷикистон эълом кардаанд, ба таври озмоишӣ интиқоли маҳсулоти кишоварзии ин кишвар дар чорчӯби тарҳи фаврии содирот ба қаламрави АвруОсиёро оғоз хоҳанд кард.
Пештар дар хабарҳо омада буд :
Вазорати кишоварзии Тоҷикистон ба аз худ кардани таҷрибаи ҳамкасбони рус ва зиёд кардани содироти сабзавоту мева ба Русия манфиатдор аст.
Дуюмин соҳаи калонтарини иқтисоди Тоҷикистон баъд аз саноат — кишоварзӣ ҳамаи душвориҳоро бомуваффақият бартараф карда, нишондиҳандаҳои худро баланд мебардорад.
Дар ин бора Нигина Анварӣ, муовини раиси Вазорати кишоварзии Тоҷикистон, дар чорчӯби ҳамоиши байнипарлумонии Русия ва Тоҷикистон дар бораи ҳамкориҳои байниминтақавӣ дар Душанбе изҳор дошт.
Нигина Анварӣ қайд кард :
“Ба он (кишоварзӣ – шарҳ аз идора) 4 ҳиссаи ММД-и кишвар рост меояд. Дар давраи пандемияи корона бахши кишоварзӣ на танҳо ба буҳрон тоб овард, балки тамоюли афзоиши беш аз 6%-ӣ нишон дод”.
Ба гуфтаи вай, сол то сол мизони интиқоли меваю сабзавот ба бозорҳои кишварҳои ИДМ афзоиш меёбад. Имкони содироти бештари маҳсулоти кишоварзӣ ба Русия махсусан таъкид шудааст.
Вай ҳамчунин иқлими мусоиди Тоҷикистонро қайд кард, ки имкон медиҳад, дар як сол то се ҳосил ҷамъоварӣ шавад. Ин имкони содиротии кишварро афзоиш медиҳад.
Дар мавриди рушди инноватсионии соҳаи кишоварзӣ байни кишварҳо Нигина Анварӣ аз имконоти вилоятҳои Самара ва Челябинск дар истеҳсоли ғалладона ва зироатҳои равғанӣ ёдовар шуда, ба дурнамои ҳамкориҳо дар ин хусус таъкид кард.
Ба гуфтаи муовини вазир, Тоҷикистон ба омӯзиш аз ҳамкасбони рус ва сармоягузорӣ дар бахши кишоварзии ҷумҳурӣ манфиатдор аст.
Вай гуфт :
“Айни замон дар низоми кишоварзӣ низоми соддакардашудаи андозбандӣ татбиқ карда мешавад”.
Дар Тоҷикистон воситаҳои истеҳсоли гӯшти мурғ ва моҳӣ, тухмӣ, техника ва таҷҳизоти кишоварзӣ барои бунёди гармхонаҳо ва ҳамчунин бахши коркарди пахта аз пардохти боҷи гумрукӣ ва як қатор навъҳои андоз озод шудаанд.
Нигина Анварӣ пешниҳод кард, ки ҷуғрофиёи ярмаркаҳои Тоҷикистон дар саросари Русия густариш ёбад.