Сафири Тоҷикистон дар Русия: “Аз сафар ба дигар шаҳру минтақаҳо ва кишварҳо худдорӣ кунед”

Имомуддин Сатторов – сафири Тоҷикистон дар Русия, дар бораи вазъияти шаҳрвандони дармондаи Тоҷикистон дар фурудгоҳҳои Маскав гуфт:

Имомуддин Сатторов – сафири Тоҷикистон дар Русия дар суҳбат бо спутник иброз доштанд, ки то дирӯз дар фурудгоҳи Домодедово 110 шаҳрванди Тоҷикистон қарор доштанд ва ҳамчунин баён карданд дар дигар фурудгоҳҳои Маск аз рӯзи 26 март то кунун ягон шаҳрванди Тоҷикистон набуд.

Сатторов гуфт “Пас аз он, ки фурудгоҳҳо қисман баста шуданд, мо аз шаҳрвандони Тоҷикистон хоҳиш кардем, ки “Домодедово” – ро тарк кунанд. Дар умум барои интиқоли шаҳрвандони Тоҷикистон ҳафт парвози вижа анҷом дода шуд: аз фурудгоҳҳои “Домодедово”, “Жуковский”, “Внуково” ва ҳамчунин 32 мусофири дармонда аз фурудгоҳи “Шереметево” ба Ватан фиристода шуданд”.

Қисми дигар он нафароне мебошанд, ки ба умеди парвоз ба Тоҷикистон аз дигар манотиқи Русия ба Маскав омада буданд.

Ҳамаи тоҷиконе, ки дар фурудгоҳи “Домодедово” монда буданд дар манзилҳои хешу ақрабо ва бархе ҳам аз ҷониби Сафорат ҷо ба ҷо карда шуданд.

Сафири Тоҷикистон дар Маскав иброз доштаст, ки “ҳукумати ҶТ бо мақсади ҳалли мушкилоти шаҳрвандони Тоҷикистон ҳамаи чораҳои заруриро андешида, аксарияти онҳоеро, ки хоҳиши ба Ватан баргаштан доштанд, тавассути 7 парвози чартерии ҳавопаймоҳои ватанӣ аз Москва ба шаҳрҳои Тоҷикистон баргардонид”, – хабар додааст сафорат.

Гуфта мешавад, дар сурати имконпазир гардидани парвози ҳавопаймоҳо, шаҳрвандон маълумотро танҳо аз сомонаҳои (сайтҳои) ширкатҳои ҳавопаймоӣ, сафорат ва консулгариҳои генералии Тоҷикистон дар Русия, инчунин дигар мақомоти расмии Тоҷикистон дарёфт хоҳанд кард.

Сафири Тоҷикистон дар Маскав таъкид кард, ки “айни замон бояд ҳар як фарди ҷомеа дуруст дарк намояд, ки ин вазъияти душвор паёмади пандемияи коронавирус буда, кишварҳо ба хотири таъмини амнияти аҳолӣ барои манъи хатсайрҳо ва бастани сарҳадҳояшон маҷбур гардиданд. Дар чунин ҳолат тасмими дуруст ва рафтори шоиста ба хотири эҳтиёт кардани сиҳатмандии худ ва аҳли хонаводаю наздикон он аст, ки аз сафар ба дигар шаҳру минтақаҳо ва кишварҳо худдорӣ карда шавад. Зеро бо сабабҳои воқеӣ, сафар кардан тавассути фурудгоҳу истгоҳҳои роҳи оҳан номумкин аст”.