Ба нақл аз дафтари матбуоти Вазорати корҳои хориҷии Тоҷикистон, намояндагони Душанбе ва Бишкек давоми шаш рӯз дар масъалаи муайян ва аломатгузорӣ кардани марзро баррасӣ карда, аз натиҷааш протоколе низ имзо кардаанд
Ба иттилои манбаъ, мулоқоти гурӯҳҳои кории кишварҳо тайи шаш рӯз дар шаҳри Душанбе баргузор шуд.
Манбаъ афзудааст: “Дар асоси мувофиқаи бадастомадаи Тарафҳо рӯзҳои 4 – 10 августи соли 2023 дар шаҳри Душанбе вохӯрии навбатии гурӯҳҳои кории топографии ҳайатҳои ҳукуматии Ҷумҳурии Тоҷикистон ва Қирғизистон оид ба делимитатсия ва демаркатсияи сарҳади давлатӣ баргузор гардид”.
ВКХ ҷузъиёти бештар аз машварати шашрӯзаи намояндагони тоҷику қирғизро нашр накардааст.
Танҳо зикр менамояд, ки ин дидор дар фазои дӯстӣ ва ҳамдигарфаҳмӣ баргузор шуд.
Ҳамин тариқ мувофиқа шудааст, ки вохӯрии навбатии тарафҳо дар Қирғизистон баргузор мегардад.
Қаблан раиси вилояти Суғд, Раҷаббой Аҳмадзода гуфт, ки дар ҳар як мулоқот онҳо перомуни боз шудани сарҳадҳои давлатӣ ва дубора барқарор шудани гардиши мол миёни кишварҳо таъкид мекунанд.
Ӯ тавзеҳ дод, ки дар мулоқот бо иштироки ҳокимони Суғду Ботканд ва Фарғона, ки ахиран дар шаҳри Иссиқкӯл баргузор гардид, ҷониби Қирғизистон гуфтааст “корро аз қоғази сафед сар мекунем” ва ҳама ноҷуриҳое, ки то ин вақт рух дод паси сар шуданд.
Бино ба гуфти ӯ, то ин замон беш аз 70 дарсади корҳо дар бораи таъйин ва аломатгузории марз бо Ҷумҳурии Қирғизистон омода шудаанд.
Қобили зир аст, ки Тоҷикистону Қирғизистон беш аз 980 километр марзи муштарак доранд, ки садҳо километри он ҳанӯз мушаххасу аломатгузорӣ нашудааст. Ин номуайянӣ мунтазам боиси таниш мегардад, ки баъзан бо хунрезӣ мепечад.