Раисҷумҳури Ӯзбекистон дар дидор бо сарвазири Тоҷикистон аз таҳкими муносибатҳои неки ҳамсоягӣ, шарикии стратегӣ ва иттифоқии ду кишвар таъкид кард.
Ба нақл аз дафтари матбуоти раисҷумҳури Ӯзбекистон, Шавкат Мирзиёев, раисҷумҳури Ӯзбекистон бо Қоҳир Расулзода, сарвазири Тоҷикистон, ки барои иштирок дар ҷаласаи навбатии Комиссияи муштараки байниҳукуматӣ ба Тошканд омадааст, мулоқт кард.
Ба иттилои манбаъ зимни мулоқот тарафҳо масоили таҳкими минбаъдаи муносибатҳои неки ҳамсоягӣ, шарикии стратегӣ ва иттифоқии Ӯзбекистону Тоҷикистонро баррасӣ намуданд.
Ҳамзамон тарафҳо дурнамои густариши ҳамкориҳоро мавриди баррасӣ қарор доданд.
Инчунин зикр карда шудааст, ки зимни мулоқот тарафҳо аз рушди босуръати ҳамкориҳои дуҷониба тибқи тавофуқномаҳои бадастомада изҳори қаноатмандӣ карданд.
Таъкид шудааст, ки ҳаҷми савдои мутақобил ва ҳамлу нақли бор дар ҳоли рушд қарор дорад ва шумораи лоиҳаҳои бомуваффақияти ҳамкорӣ низ афзоиш ёфтааст.
Равобити наздики байниминтакавӣ барқарор карда шуда, фаъолона мубодилаи маданию башардӯстонаӣ сурат мегирад.
Барои андешидани тадбирҳои муассир барои афзоиши гардиши мол, пешбурди лоиҳаҳои ояндадор дар соҳаҳои энергетика, мошинсозӣ, кишоварзӣ, нақлиёт, истихроҷи маъдан, нассоҷӣ ва дигар соҳаҳо бо ҷалби маблағгузории ширкатҳои сармоягузори Ӯзбекистон ва Тоҷикистон таваҷҷуҳи хос зоҳир гардид.
Дар ин замина аҳамияти иҷрои амалии қарорҳои ҷаласаи Комиссияи муштараки байниҳукуматӣ, ки имрӯз таҳти раёсати нахуствазирони ду кишвар дар шаҳри Тошканд баргузор шуд, таъкид шуд.