Маркази матбуоти Қӯшунҳои сарҳадии КДАМ ҶТ хабар додааст, ки шоми 3 июл, тақрибан соати 18:30 вазъият дар ду минтақаи вилояти Бадахшон мураккаб шуд.
Бино ба гузориши КДАМ, вазъ дар деҳаи Овези вулусволии Хоҳон, вулусволии Шаҳрибузург ва деҳаи Зиракии вулусволии Роғистони вилояти Бадахшони Афғонистон мураккаб гардида, минтақаҳои номбурда аз тарафи ҳаракати “Толибон” тасарруф шуданд.
Манбаъ афзуда, ки дар натиҷаи задухурди мусаллаҳона ҳаракати “Толибон” комендатураи сарҳадии “Овез”-и вулусволии Хоҳонро низ ишғол намуданд.
Дар хабарнома омадааст: “Бештар аз 300 низомии Қувваҳои мусаллаҳи ҶИА ба муқовимати мусалаҳона тоб наоварда, бо мақсади наҷоти худ тавассути минтақаи муҳофизатии байни дидбонгоҳҳои 5-уми “Истиқлол” ва 6-уми “Сариғор”-и Отряди сарҳадии “Ш.Шоҳин” сарҳади давлатиро убур карда, ба худуди Тоҷикистон гузаштанд”.
КДАМ мегӯяд, сарҳадбонони тоҷик бо назардошти принсипи инсондустӣ ва ҳусни ҳамҷаворӣ ба гурезагони иҷборӣ барои воридшавӣ ба қаламрави Тоҷикистон иҷозат доданд.
Манбаъ афзуда, ки вазъият дар марз байни Тоҷикистону Афғонистон таҳти назорати пурраи сарҳадбонони тоҷик қарор дорад.
Ёдрас мешавем, ки тайи як моҳи ахир “Толибон” 13 вулусволии вилояти Тахорро забт карданд. Се вулусволии дигар – Фархор, Варсач ва Калафгон, ҳамчунин шаҳри Толиқон – маркази вилоят ҳанӯз дар ихтиёри ҳукумати Афғонистон аст.