Фаромуз Иргашев мегӯяд, зиндагии ӯ пас аз интихоботи ахири президентӣ дар Тоҷикистон тағйир наёфт. Ӯ мегӯяд, чун пештара дар талоши зиндагӣ аст ва ба хондану хизмат расондан ба мардуми Бадахшон машғул аст.
Иргашев дар мусоҳиба ба сомонаи “Ширчой” далели роҳ наёфтани худ ба сабқати асосии интихоботи президентӣ дар Тоҷикистон шарҳ дод. Адвокати ҷавон омили асосиро ба бетаҷрибагии худ рабт медиҳад. Ҳамчунин, ба гуфтаи ӯ омода набудани мардум низ як сабаби канор монданаш аз интихобот шуд.
Иргашев танҳо нафаре буд, ки талош кард аз тариқи худпешбарӣ номзадии худро дар интихоботи президентии Тоҷикистон бигузорад.
Ӯ мегӯяд, нахустин бор ин фикр дар сараш замоне пайдо шуд, ки раисиҷумҳур Эмомалӣ Раҳмон синни номзадҳо ба президентиро аз 35 ба 30 сол поин кард.
Иргашев шарҳ додааст: “Ман баъди ин тағйирот дар системаи интихоботи президентӣ ба дӯстонам мегуфтам, ки ин кор махсус барои ман анҷом шудааст ва ҳатман бояд номзадии худро пешбарӣ кунам”.
Гузашта аз ин, ҳуқуқшинос таъйид намуд, ки 7 сол аз ҳуқуқу манфиатҳои мардум ҳимоя мекард ва давоми ин солҳо, шоҳиди бедодгарии зиёди кормандони давлатӣ шуд.
Ӯ аз ҷумла, аз қадр надоштани ҷони инсон, ба ҷавобгарӣ кашида нашудани қотилон, фиреб додани одамони солманд, барои гуноҳи ночиз ба мудатҳои тӯлонӣ равона шудани ҷавонон ба зиндон, аз фасоду хешутаборбозии рӯи рост изҳори нигаронӣ намудаст.
Адвокати ҷавон гуфтааст: “Танҳо ба хотири пешгирӣ кардан аз ин гуна бедодгариҳо номзадии худро пешбарӣ кардам, аммо мутаассифона талоши ман бенатиҷа монд”.
Фаромӯз мегӯяд, ҳоло дар пайи пайдо кардани донишгоҳ аст, чун зиёд мехоҳад таҳсилашро идома диҳад. Ӯ гуфт то пайдо кардани донишгоҳ дар хизмати халқу ватан аст.
Вай изҳор намуд: “Агар имкони таҳсил карданро дарёфт накардам, корамро дар шаҳри Хоруғ идома медиҳам ва соли 2027 – ро интизор мешавам”.
Ёдовар мешавем, ки тасмими Фаромуз Иргашев дар мавриди аз тариқи худпешбарӣ иштирок кардан дар интихоботи президентии Тоҷикистон, сару садоҳои зиёдеро ба миён овард.
Бархе мегуфтанд, ӯ як бозигари “худӣ” – и ҳукумат аст, аммо бархеи дигар бар ин бовар буданд, ки ӯро кадом дастае аз хориҷу дохил ба ин майдон партоб кард.
Он замон, Фаромуз дар посух ба ҳамаи ин итиҳомот мегуфт, ки фақат такя ба мардуми одӣ ва давлати Тоҷикистон мекунад.