Пештар Доналд Трамп, ки таҳдид кард алайҳи Туркия таҳримҳои бештар ҷорӣ мекунад, хостори поён додан ба ин ҳамла шудааст.
Раиси ҷумҳури Амрико қаблан дастури хуруҷи неруҳои амрикоӣ аз шимол-шарқи Сурия дода буд. Ҳузури ин неруҳо, ки пуштибони ниманизомиёни курд дар ҷанг бо гурӯҳи “Давлати исломӣ” буданд, то ба ҳол монеъ аз ҳамлаи густурдаи Туркия ба Сурия шуда буд. Дар пайи эъломи хуруҷи неруҳои амрикоӣ, амалиёти Туркия дар Сурия оғоз шуд ва аз як ҳафта ба ин тараф идома дорад.
Амрико рӯзи душанбеи 14-уми октябр таҳримҳоеро алайҳи Туркия ҷорӣ кард, то ҷилави густариши амалиёти он кишвар дар шимол-шарқи Сурияро бигирад. Доналд Трамп гуфтааст, “мо хостори оташбас ҳастем” ва агар Туркия аз он пайравӣ накунад, роҳҳои бисёре барои бархӯрд бо он вуҷуд дорад.
Раҷаб Тайиб Ардуғон, раиси ҷумҳури Туркия рӯзи 15-уми октябр дар бозгашт аз сафар аз Боку, ба хабарнигорон гуфт, ҳамлаҳо то вақте, ки Анқара ба ҳадафаш нарасад, идома хоҳад дошт. Оқои Эрдуғон гуфтааст, ки нигарони таҳримҳо нест.
Раиси ҷумҳури Туркия дар миёни хабарнигорон изҳор кард, “гуфтанд, оташбас эълон кун. Мо ҳаргиз оташбас эълом нахоҳем кард. Бар мо фишор меоваранд, то ба амалиёт поён диҳем. Таҳримҳо ҷорӣ мекунанд. Ҳадафи мо рӯшан аст. Мо нигарони ҳеҷ таҳриме нестем”.
Раҷаб Тайиб Ардуғон мегӯяд, ки дар гуфтугӯи телефонӣ бо Доналд Трамп дар авоили ҳафтаи ҷорӣ, хостори фиристодани як ҳайати амрикоӣ барои баҳс дар мавриди хостаҳо ва талошҳо барои даст ёфтан ба як созиш шудааст.
Трамп қаблан эълон карда буд, ки муовини худро ҷиҳати музокирот барои даст ёфтан ба оташбас, ба Туркия мефиристад. Вазири дифои Амрико низ гуфтааст, ки президенти Туркия масъули тамоми оқибатҳои ҳамла ба Сурия, аз ҷумла, дигарбора қувват гирифтани гурӯҳи “Давлати исломӣ” ва “ҷиноятҳои ҷангӣ” дар ин минтақа аст.
Анқара мегӯяд, ниманизомиёни курди Сурия дар гурӯҳи “Воҳидҳои мудофеи халқ” бахше аз Ҳизби коргарони Курдистон ва як “гурӯҳи террористӣ” ҳастанд. Амрико ҳарчанд Ҳизби коргарони Курдистонро гурӯҳи террористӣ медонад, аммо Воҳидҳои мудофеи халқро террористӣ намедонад ва ин гурӯҳ дар ҷангҳои заминӣ алайҳи гурӯҳи “Давлати исломӣ” нақши муҳим ифо кардааст.
Раиси ҷумҳури Туркия ба вуруди артиши Сурия ба корзор низ вокуниш нишон додааст. Неруҳои курд ахиран аз тавофуқе бо ҳукумати Башор Асад хабар дода буданд ва сарбозони суриягӣ низ ҳамзамон бо хуруҷи неруҳои амрикоӣ, дар шаҳрҳои курднишин ҷобаҷо шуданд. Аз ҷумла, рӯзи шанбе ҳамзамон бо хуруҷи сарбозони амрикоӣ аз Манбиҷ, Димишқ эълон кард, ки артиши Сурия вориди маркази ин шаҳр шудааст.
Раҷаб Тайиб Ардуғон гуфтааст, “ҳукумати Сурия вориди Манбиҷ шудааст. Барои ман ин масъала зиёд манфӣ нест. Чаро? Чун дар ниҳоят ин кишвари онҳост. Ончи барои ман муҳим аст, ин аст, ки гурӯҳи террористӣ боқӣ намонад”.
Ӯ афзудааст, “ман инро ба оқои Путин, раиси ҷумҳури Русия, ҳам гуфтам. Агар шумо Манбиҷро аз гурӯҳҳои террористӣ пок мекунед, дар он сурат бифармоед, шумо ё ҳукумати Сурия метавонед ҳамаи омодагиҳоро анҷом диҳед. Аммо агар на, мардум онҷо ба мо мегӯянд, ки биравем, наҷоташон диҳем”. Раиси ҷумҳури Туркия нагуфт, ки чигуна ва аз чӣ тариқе чунин паёмеро аз сокинони Манбиҷ дарёфт хоҳад кард.
Рӯзи сешанбе гузоришҳое ба нашр расид, ки тибқи он неруҳои русӣ дар хатти ҷабҳа байни неруҳои Сурия ва Туркия гаштугузор мекунанд. Ин хат дар шимоли Манбиҷ қарор дорад. Бархе расонаҳои байналмилалӣ мегӯянд, ки пас аз эълони хуруҷи неруҳои амрикоӣ аз шимол-шарқи Сурия, Русияро фавран вориди амал шуд, то ин холигоҳро ба нафъи худ пур кунад.
Доналд Трамп қаблан гуфта буд, “мушкиле надорам, ки ҳар касе хост, ба Сурия кӯмак кунад, то аз курдҳо муҳофизат кунад, хоҳ Русия бошад ё Чин. Умедворам хуб амал кунанд. Мо ҳафт ҳазор километр аз онҷо дур ҳастем”.