Ба гузориши Тоҷик Пресс, як созмони ҳомии ҳуқуқи инсон боздошти Шарофиддин Гадоев, фаъоли мухолифини тоҷикро “намунаи тарсноки сӯистифода аз Интерпол” барои таъқиби паноҳҷӯён ва ҳамчунин хабарнигорону ҳомиёни ҳуқуқ ва раҳбарони мухолифини сиёсӣ номидааст.
Созмони “Fair Trials” ё “Муҳокиматҳои Одилона” рӯзи 13-и май бо нашри баёнияи расмие гуфт, ки мақомоти Тоҷикистон дархости боздошт аз Интерполро барои таъқиби мухолифони худ истифода кардаанд. “Fair Trials” дар Лондон ва Брюсселу Вашингтон қароргоҳ дорад ва барои ҳимоят аз ҳуқуқи паноҳҷӯён ва афроди дигарандеш, ки бегуноҳ таъқиб мешаванд, ёрӣ мерасонад.
Мақомоти Тоҷикистон таъқиби мухолифони сиёсиро рад мекунанд. Онҳо мегӯянд, ин афрод барои ҷиноятҳое, ки содир кардаанд, таъқиб мешаванд ва дархост аз Интерпол ҳам дар ин замина сурат мегирад.
Шарофиддин Гадоев, яке аз фаъолони мухолифини тоҷик, соли 2012 кишварро тарк карда, феълан дар Ҳолланд зиндагӣ мекунад ва дар онҷо санади паноҳандагӣ гирифтааст.
Ӯ моҳи феврали имсол, ҳангоми сафараш ба Маскав аз тарафи маъмурони амниятии Русия дастгир ва зӯран ба Тоҷикистон бурда шуд. Созмони “Fair Trials” мегӯяд: “Дар мавриди Гадоев, Тоҷикистон ба таври возеҳ сиёсати Интерполро дар бораи паноҳҷӯён нақз кардааст.”
Дар баёнияи ин созмон омадааст: “Ҳангоми интиқол ва боздошт ба ин фаъоли 33-солаи мухолифин бадрафторӣ кардаанд. Дар Маскав маъмурони амниятии Русия Гадоевро ба мошин шинонда, сарашро бо халта пӯшондаанд ва даҳонашро бастаанд. Ӯро пеш аз савор кардан ба ҳавопаймои Душанбе латту кӯб намудаанд”.
Гадоев иддао мекунад, ки мақомоти тоҷик низ ӯро дар дохили ҳавопаймо таҳдид карда ва задаанд. Созмони “Fair Trials” мегӯяд, Гадоевро аввал ба як шӯъбаи ВКД ва сипас тавассути мақомоти амниятӣ ба як ҷои номаълум бурда шудааст.
Масъулони созмони “Fair Trials” ҳамчунин эълом карданд: “Қазияи Гадоев дигарбора поймоли густардаи ҳуқуқи инсон ва маҳдудтар шудани фазо барои фаъолияти мухолифин ва ҷомеаи маданиро дар Тоҷикистон бармало кард. Бисёре аз фаъолони мухолифин ҳанӯз ҳам паси панҷара мемонанд, вале ба шарофати фишорҳои байналмилалӣ, кишварҳои хориҷӣ ва фаъолони ҳуқуқи инсон, мақомоти Тоҷикистон Гадоевро раҳо карданд ва ӯ рӯзи 2 март амн ба Ҳолланд баргашт”.
Дар хориҷи Тоҷикистон, асосан дар кишварҳои аврупоӣ даҳҳо тоҷикистониёне зиндагӣ мекунанд, ки мегӯянд, дар пайи саркӯб шудани мухолифон ва маҳдуд шудани фазои сиёсӣ дар кишвар дар ин давлатҳо паноҳанда шудаанд.
Дар миёни онҳо аъзои ҲНИТ, “Гурӯҳи 24”, журналистон, вакилони дифоъ, фаъолони ҷомеаи шаҳрвандӣ мебошанд.
Созмонҳои байналмилалии ҳомии ҳуқуқ мегӯянд, ки баъди интихоботи президентии соли 2013 фазои сиёсии Тоҷикистон маҳдуд шуд ва дар интихоботи парлумонии ду сол баъдаш ҳеҷ кас аз ҳизби мухолифи ҳукумат ба узвияти маҷлис роҳ наёфт.