Дар баробари афзоши ихроҷ ба гуфтаи ВКД, шумори ҷиноятҳои ошкоршуда вобаста ба ташкили муҳоҷирати ғайриқонунӣ 2,5 маротиба афзоиш ёфтааст.
Дар соли ҷорӣ мизони ихроҷи хориҷиҳо аз Русия ба таври қобили мулоҳиза афзудааст.
Ҳамин тариқ, дар семоҳаи аввали соли 2024 ҳудуди 22 ҳазор хориҷӣ, ки қонунҳои Федератсияи Русияро нақз кардаанд, аз ин кишвар ихроҷ шудаанд.
Ин назар ба ҳамин давраи соли 2023 қариб ду баробар зиёд аст.
Тибқи гузориши таҳлилии Вазорати корҳои дохилии Русия, дар семоҳаи аввали соли ҷорӣ дар бораи ихроҷи шаҳрвандони хориҷӣ аз ФР 38 ҳазор қарор қабул шудааст, ки нисбат ба ҳамин давраи соли 2023 28,5% зиёд аст.
Ҳамчунин дар ин давра, 669 нафари дигар аз шаҳрвандӣ маҳрум шудаанд, гузориш медиҳад, ин ниҳод.
Илова бар ин, ба гуфтаи ин ниҳод, шумори ҷиноятҳои ошкоршуда вобаста ба ташкили муҳоҷирати ғайриқонунӣ 2,5 маротиба (ба 676) афзоиш ёфтааст.
Илова бар ин, пулис вуруди ҳудуди 79 ҳазор шаҳрванди хориҷиро ба Федератсияи Русия манъ кардааст, ки нисбат ба чаҳор моҳи соли 2023 қариб 24 ҳазор нафар бештар аст.
Ҳамчунин, шумори иҷозатномаҳои муваққатии иқомат-РВП 40% ва шумораи иҷозатномаҳои иқомат – ВНЖ 20% кам шудааст.
Мақомоти давлатҳои Тоҷикистону Русия ба густариши ҳамкориҳо дар арсаи мубориза бо терроризм таъкид карданд
Дар дидори вазирони кишвари Тоҷикистон ва Русия омодагии ду тараф барои густариши бештари ҳамкориҳо дар заминаи мубориза бо ҷурму ҷиноят эълон шуд.
Рамазон Раҳимзода, вазири корҳои дохилаи Тоҷикистон бо Владимир Колокотсев, ҳамтои русии худ, ки ба Душанбе сафар кардааст, дидор ва гуфтугӯ карданд.
Тайи ин дидор дар хусуси тақвияти ҳамкориҳо дар заминаи мубориза бо ҷурм ва ҷиноят, ҷилавгирӣ аз ҷазби шаҳрвандони Тоҷикистон ба аҳзоб ва ҷунбишҳои ғайриқонунӣ, беҳбуди ҳамкорӣ дар ҳавзаи муҳоҷират, ҳалли мушкилоти марбут ба вазъияти қонунӣ, беҳбуди шароити зиндагӣ, ҳифозат аз ҳуқуқ ва манофеи шаҳрвандони Тоҷикистон дар Русия баҳс ва табодули назар шуд.
Дар ин дидор ибрози итминон шуд, ки ҳар ду тараф ҳамеша барои густариши ҳамкорӣ дар заминаи мубориза бо ҷурм ва ҷиноят, терроризм, ифротгароӣ, ҷароими сайберӣ, табодули иттилоот ва ҳалли мавзуъҳои марбут ба муҳоҷират ва омӯзиши кодрҳои ҳирфаӣ, омода ҳастанд.