Тартиби соддакардашудаи гирифтани шиносномаи Русия барои шаҳрвандони як қатор кишварҳо омода мешавад, ки баъзе талаботҳоро кам мекунад.
Дар Русия як ислоҳ ба қонун “Дар бораи шаҳрвандӣ” пешниҳод шудааст, ки ҳуқуқи шаҳрвандони 4 кишвар барои дарёфти соддакардашудаи шаҳрвандии Русия барқарор карда шавад, менависад РИА Новости.
Ин имконро шаҳрвандони Беларус, Қазоқистон, Молдова ва Украина, ки дар Русия зиндагӣ мекунанд ва иҷозатномаи иқомат гирифтаанд, дастрас хоҳанд кард.
Ҳамин тариқ, дар намунаи лоиҳаи қонун, ки дар қироати аввал қабул шудааст, чунин ҳуқуқ тавассути фармони президент пешбинӣ шудааст.
Муовини аввали раиси Кумитаи Думаи давлатии Русия дар умури ИДМ Константин Затулин ин санадро шарҳ дод.
Вай гуфт:
“Аммо чаро мунтазири фармон шуд? Агар қонуни феълӣ ба онҳо ин ҳуқуқро додааст, чаро қонуни нав ин ҳуқуқро мегирад? Дар ислоҳи пешниҳодшуда ин масъала аз байн меравад”.
Вакил дар бораи дигар ислоҳҳои тайёршуда низ изҳори назар кард.
Сухан дар бораи шартҳои иқомат дар Федератсияи Русия меравад, то ба шаҳрвандии содакардашуда мувофиқат кунад. Ӯ пешниҳод дорад, ки мӯҳлатҳо аз 3 сол ба 1 сол кам карда шаванд.
Лоиҳаи қонун ҳамчунин коҳиши теъдоди талабот ба беш аз 20 категорияи шахсон ҳангоми қабули шаҳрвандии Русия ва тавсеаи салоҳиятҳои раисиҷумҳурро барои муайян кардани категорияи шахсоне, ки ҳуқуқ ба дарёфти содакардашударо доранд, пешбинӣ мекунад.
Бар асоси гузориши Вазорати корҳои дохилии Русия, 173 ҳазору 634 нафар тоҷикистониён дар соли 2022 шаҳрвандии Русияро гирифтаанд. Ин рақам шумораи рекордӣ дониста мешавад.
Дар муқоиса бо соли 2021, ки 103 ҳазору 681 нафар ба шаҳрвандии Русия соҳиб шуда буданд, омори соли 2022 қариб 70 ҳазор нафар зиёд шудааст.
Агар омори соли 2022 – ро ба як соли тақвимӣ тақсим кунем, маълум мешавад, ки ба ҳисоби миёна ҳар рӯз 476 шаҳрванди Тоҷикистон шаҳрванди Русия шудаанд.
Дар дарёфти шаҳрвандии Русия байни кишварҳои минтақаи Осиёи Марказӣ шаҳрвандони Тоҷикистон пешсафанд.
Соли 2022 ба сурати умум 691 ҳазору 45 нафар хориҷиён шаҳрвандии Русияро гирифтаанд. Дар панҷгонаи кишварҳое, ки сокинони онҳо шаҳрвандии Русияро гирифтаанд, Тоҷикистон дар мақоми дуюм қарор дорад.
Ҳамчунин тибқи маълумоти ВКД Русия, 121 ҳазору 122 шаҳрванди Тоҷикистон Ҳуҷҷати иҷозаи зист (ВНЖ) дар Русияро доранд. Ин маънои онро дорад, ки то шаҳрванди Русия шудани онҳо як қадами дигар мондааст. Ба гумони ғолиб, соли 2023 онҳо ба шаҳрвандии Русия соҳиб мешаванд.
Боз 47 ҳазору 987 нафар тоҷикистониён дорои Иҷозаи зисти муваққатӣ (РВП) мебошанд. Ин қадами аввал барои соҳиб шудан ба шаҳрвандии Русия аст.