Тоҷикистон ва Литва корхонаҳои муштарак бунёд мекунанд.
Эҷоди шароити мусоид барои бозорёбии маҳсулоти кишоварзӣ, сармоягузории муштарак барои фароварии маҳсулоти металургӣ байни Тоҷикистон ва Литва дар дидори Абдураҳмон Абдураҳмонзода, муовини вазири рушди иқтисод ва тиҷорати Ҷумҳурии Тоҷикистон бо сафири Литва дар Тоҷикистон баррасӣ шуд.
Дар ин дидор тарафайн дар мавриди фурсатҳои ҳамкории бештар табодули назар карданд.
Афзоиши мубодилоти тиҷорӣ байни Тоҷикистону Литва, сохти корхонаҳои муштарак дар манотиқи озоди иқтисодӣ, тавсеаи ҳамкориҳои дуҷониба дар тиҷорати электронӣ ва иқтисоди диҷиталӣ аз дигар мавзуоти матраҳшуда дар ин мулоқот буд.
Пештар дар хабарҳо омада буд :
Муовини вазири рушди иқтисод ва савдои Тоҷикистон хостори эҷоди ширкатҳои муштараки тавлиди маҳсулоти ғизоӣ бо Эрон дар манотиқи озоди иқтисодии ҷумҳурӣ шуд.
Абдураҳмон Абдураҳмонзода, муовини вазири рушди иқтисод ва савдои Тоҷикистон ва Паринози Пешдодиён, раиси Маркази тиҷории “Фикри бартар”-и Эрон дидору гуфтугӯ карданд, иттилоъ додааст дафтари матбуотии Вазорати иқтисод ва савдои кишвар.
Тибқи иттилои манбаъ, ҷониби Тоҷикистон дар ин дидор ба тарафи Эрон барои боз ҳам рушд додани ҳамкориҳои тиҷоративу иқтисодӣ пешниҳод намуд, ки корхонаҳои муштараки истеҳсоли обҳои минералӣ, инчунин хамираи помидор ва консервабарорӣ дар ҳудуди минтақаҳои озоди иқтисодии Тоҷикистон таъсис диҳанд.
Пешдодиён дар навбати худ аз пешниҳоди тарафи тоҷикистонӣ истиқбол ва хотирнишон кард, ки ин ибтикор боиси тақвияти бештари ҳамкориҳои тиҷорию иқтисодии ду кишвар хоҳад шуд.
Тарафайн ҳамчунин масоили марбут ба таҳия ва имзои ёддошти тафоҳуми ҳамкорӣ байни манотиқи озоди иқтисодии Тоҷикистону маркази тиҷории “Фикри бартар”-и Эрон ва мавзуоти муҳими ҳамкориҳои тиҷорӣ, иқтисодӣ ва сармоягузориро баррасӣ карданд.
Дар ҳамин ҳол зимни дидор муовини вазири рушди иқтисод ва савдои Тоҷикистон иттилоъ додааст, ки дар 11 моҳи соли 2021 гардиши молии байни Эрону Тоҷикистон ба 93,2 миллион доллар расидааст, ки нисбат ба ҳамин давраи соли гузашта 44,6 миллион доллар бештар аст.
Саҳми тиҷорати мутақобил бо Эрон дар кулли гардиши молии Тоҷикистон тайи ин давра 1,7 дарсад буда ва дар сохтори тиҷорати хориҷӣ ин кишвар дар ҷойгоҳи нуҳум қарор дорад.