Сандуқи байналмилалии пул аз мақомоти Тоҷикистон хост барои беҳбуди вазъи молии Ширкати “Барқи Тоҷик” қимати барқро афзоиш диҳад.
Дар ин дархост таъкид шудааст, барои шафофияти амалкарди Ширкати давлатии “Барқи Тоҷик” ва коҳиши қарзи ин ниҳод, зарурати афзоиши қимати барқи масрафӣ дар Тоҷикистон вуҷӯд дорад.
Ин дар ҳоле аст, ки тайи 10 соли ахир қимати ҳар киловат/соат барқи бахши хонагӣ аз 9 дирам дар соли 2010 ба 22.6 дирам дар соли 2020 расид.
Мақомоти Тоҷикистон далели афзоиши дубораи қимати барқ дар кишварро дархости ниҳодҳои молии байналмилалӣ ва минтақӣ эълом мекунанд, онҳо мегӯянд, яке аз шароити пардохти қарзи ниҳоди молӣ ба Тоҷикистон афзоиши қимати барқ дар бахшҳои мухталиф аст.
Коршиносон низ муътақиданд бо ихтисоси қарзҳои зиёд ва афзоиши қимати барқ дар Тоҷикистон авзоъи молии ширкати “Барқи тоҷик” беҳбуд намеёбад.
Ширкати “Барқи Тоҷик” бо 32 миллиард сомонӣ қарздортарин идораи давлатии Тоҷикистон аст.
Пештар дар хабарҳо омада буд :
Моҳи феврали соли равон Тоҷикистон ба маблағи 2 млн 286 млн доллар қувваи барқ ба хориҷи кишвар содир кард, ки 21,3% ё худ 620 ҳазор доллар камтар нисбат ба моҳи гузашта аст.
Маблағи умумии аз содироти барқ бадастомада дар моҳҳои январ-феврали соли 2022 ҳудуди 5,2 млн долларро ташкил дод, хабар медиҳад Агентии омор.
Дар ҳамин давраи соли 2021 ҷумҳурӣ аз ҳисоби содироти барқ ба хориҷи кишвар 7 млн доллар маблағ ба даст овардааст.
Раҳбарияти ШСХК “Барқи тоҷик” қаблан чандин бор изҳор дошта буд, ки дар мавсими тирамоҳу зимистон (октябр-апрел) барқи Тоҷикистон дар ҳаҷми начандон зиёд баҳри дар ҳолати коршоям нигоҳ доштани зербино, аз ҷумла хатҳои интиқоли барқ, зерситгоҳҳои барқӣ ва трансформаторҳо танҳо ба Афғонистон интиқол дода мешавад.
“Дар давраи тирамоҳу зимистон Афғонистон шабонарӯзӣ 25-30 МВт барқ мегирад, ки ба ҳаҷми умумии таъминоти барқ дар кишвар таъсир намерасонад”, – зикр шуда буд дар изҳороти ахири”Барқи тоҷик”.
Гап сари он аст, ки аз моҳи октябр то моҳи апрел дар дохили Тоҷикистон камбуди барқ ба мушоҳида расида, сокинони минтақаҳо гоҳ-гоҳ аз интиқоли барқ маҳрум мешаванд.
Дар назар аст, ки аз моҳи апрел ҳаҷми интиқоли барқ ба Афғонистон то 400 МВт дар як шабонарӯз зиёд карда шавад. Ҳамчунин бо фарорасии фасли баҳор содироти барқи Тоҷикистон ба Ӯзбекистон низ шурӯъ мешавад.
Мувофиқи қарордҳои имзошуда байни “Барқи тоҷик” ва ширкатҳои электроэнергетикии кишварҳои зикршуда, соли 2022 Тоҷикистон ба интиқоли 1,5 млрд кВт/соат барқ ба Афғонистон ва 1,4 млрд кВт/соат барқ – ба Ӯзбекистон уҳдадор шуд.
Қобили зикр аст, ки барои ҳар 1 киловатт/соат Афғонистон 4,67 сент ва Ӯзбекистон – 2 сент маблағ пардохт мекунанд.
Нимаи моҳи феврали соли ҷорӣ раҳбарияти “Барқи тоҷик” дар нишасти матбуотӣ хабар дод, ки қарзи ширкати Афғонистон ба Тоҷикистон аз истифодаи барқ аз 33 млн доллар дар аввали соли 2022 то ба 27 млн доллар кам шудааст.
Бино ба маълумоти Агентии омор, давоми моҳҳои январ-феврал дар Тоҷикистон ҳудуди 3,8 млрд киловатт-соат неруи барқ истеҳсол шудааст, ки 9,8% зиёдтар нисбат ба ҳамин давраи соли 2021 аст.