«Раҷаб Тайиб Ардуғон» раиси ҷумҳури Туркия имрӯз (панҷшанбе) ба интиқоди муҷаддад аз рӯйкарди дугонаи кишварҳои ғарбӣ дар қиболи терроризм ва буҳрони муҳоҷирон пардохт.
Ба навиштаи хабаргузории «Онотули» Ардуғон тайи суханронӣ дар мизигирди иҷлоси кишварҳои исломӣ дар Малайзия, тавзеҳ дод: «вақте, ки дарбораи эҷоди минтақаи амн [дар шимоли Сурия] ҳарф мезанем, онҳо ҳеҷ ҳимояте намекунанд, аммо вақте ба мавзӯъи таслиҳот мерасем, силоҳ [ба террористҳо] ироа мекунанд».
Вай бо баёни инки онҳо (кишварҳои ғарбӣ) доим аз лузуми мубориза бо терроризм сӯҳбат мекунанд, изҳор дошт: «чигуна бояд бо террористҳо ҷангид? Мубориза бо терроризм бо калимот нест, балки бо амал кардан аст».
Бар ин асос, раиси ҷумҳури Туркия зимни муттаҳам кардани Русия ва давлати Сурия ба анҷоми ҳамалоти ҳавоӣ ба минтақаи Адилиб, муддаӣ шуд, ки ҳамакунун корвонҳои шомили маҷмӯан 50 ҳазор овораи сурӣ дар ҳоли ҳаракат ба самти марзҳои Туркия аз Адилиб ҳастанд.
Иҷлоси сарони кишварҳои исломӣ субҳи имрӯз бо ҳузури сарони кишварҳои Эрон, Малайзия, Туркия ва Қатар ва садҳо тан аз шахсиятҳо ва нухбагони кишварҳои исломӣ дар Куала Лумпур оғоз шуд.
Ардуғон, пештар дар суханронии ифтитоҳияи иҷлоси кишварҳои исломӣ дар Малайзия ба интиқоди муҷаддад аз сохтори Шӯрои Амнияти Созмони Милал пардохта ва гуфта буд, сарнавишти ҷамъияти 1.7 милиярдии мусалмонон дигар дар дастони панҷ узви доими ин шӯро нест.