Абдусаттор Бобоев муҷрии шабакаи ПМТ: Шумо соли 2015 баъди интихоботи парлумонӣ дар мусоҳиба ба радиои Озодӣ гуфта будед, ки дар оянда Тоҷикистонро мушкили калон фаро мегирад, вале дер давом намекунад ва ояндаи Тоҷикистонро дурахшон мебинам. Чӣ мушкиле буд ва ҳаст? Шумо, ки он замон вакили парлумон будед, чаро пеш аз баромаданатон аз Тоҷикистон коре накардед? (Лутфуллоҳ Сафаров)
Ҷаноби Муҳйиддин Кабирӣ: Агар ҳамон тавре ки гуфта шуд бошад ин масъала ба нимаи аввали моҳи марти соли 2015 бармегардад чун ман шонздаҳуми март аз Тоҷикистон баромадам. Барои пешбинӣ кардани мушкили ояндаи Тоҷикистон дар он замон ақли фавқулода лозим набуд, чун раванди ҳаводиси он шабурӯз ва рафторҳои мақомот нишон медод, ки Тоҷикистон вориди марҳилаи душвор мешавад. Дар асари сӯҳбат бо апарати президент, мақомоти қудратӣ ва намояндагони парлумон ба ин натиҷа расидам. Пеш аз баромадан аз кишвар се соат бо раиси КДАМ Ятимов сӯҳбат доштам. Маҷмӯи сӯҳбатҳо ва таҳлилҳо ва рафтори мақомот дар интихоботи 2015 нишон дод, ки ҳукумат ба хусус Раҳмонов ба хотири расидан ба ҳадафҳои шахсӣ дидаву дониста Тоҷикистонро вориди буҳрон ва марҳилаи душвор мекунанд. Ин масъала равшан дар сӯҳбатҳо ва таҳлилҳои коршиносон ошкор буд. Чаро ман ин марҳиларо тулонӣ намедонистам? Албатта мафҳуми тулонӣ ё кӯтоҳ нисбӣ ҳаст ва барои мисол чанд сол дар назди таърих кутоҳ аст. Мо талош дорем, ки ин муддат кӯтоҳтар аз он чӣ Раҳмон мехоҳад бошад ва мехоҳем миллат ва мо ин марҳилаи сахти буҳронӣ ва хонаводагии имрӯзро зудтар паси сар кунем. Агарчӣ чанд сол дар назди таърих зиёд нест, вале табиӣ аст, ки дар ин муддат афроде шаҳид ва кушта мешаванд ва маълум нест, ки мо ҳастем ё не, вале барои миллат тулонӣ нахоҳад буд. Боварӣ дорам баъд аз ин вазъият миллат вориди марҳилат ҷадид ва пешрафт хоҳад шуд, чун ҳокимияти хонаводагӣ поинтарин марҳилаи ҳукумати як диктатор аст. марҳилаи диктатории фардӣ, ки Раҳмон қудратро дар дасташ ҷамъ кард пушти сар гузоштем ва баъд ба диктатории хонаводагӣ расид ва бо овардани фарзандону хешу табораш мехоҳад ҳукуматро баёни онҳо тақсим кунад. Ин поёни як диктатор аст. Таҳаммули миллат ҳам поён дорад, ки як шахс ё хонаводааш ӯро таҳқир кунад ва дороиҳои миллатро бидуздад ва фақат барои худ ва хонаводааш бигирад ва бар онҳо ҳукумат кунад. Боварӣ дорам, ки миллат беш аз ин таҳаммул нахоҳад кард. Аз ин рӯ мо имрӯз дар марҳилаи душвор ҳастем, вале умедворем, ки тулонӣ нахоҳад буд ва баъд аз он марҳилаи шукуфоии миллат ва давлати Тоҷикистон фаро хоҳад расид.