Шоми 7 ноябр, як гуруҳи роҳбарон ва тарафдорони мухолифини тоҷик дар шаҳри Порис, пойтахти Фаронса дар назди дафтари МЕДЕФ – Анҷумани соҳибкорони Фаронса алайҳи сафари президенти Тоҷикистон Эмомалӣ Раҳмон таҷаммӯи эътирозӣ доир карданд.
Эмомалӣ Раҳмон шоми 7 ноябр баъди анҷоми боздидаш аз Швейтсария вориди Порис шуд ва қарор аст, шоми 7 ноябр дар як зиёфати хурд дар МЕДЕФ, ки Шӯрои тиҷоратии Фаронсаву Тоҷикистон ташкил кардааст, бо соҳибкорони фаронсавӣ мулоқот кунад.
Эмомалӣ Раҳмон аз 4 ноябр дар Швейтсария қарор дошт ва гуруҳе аз тарафдорони ҳаракати оппозитсионии “Гуруҳи 24” рӯзи 5 ноябр дар шаҳри Берни Швейтсария алайҳи сафари ӯ эътироз карданд.
Дар таҷаммӯи эътирозии мухолифин дар Порис аз намояндагони шинохтаи мухолифин аз ҷумла Бобоҷон Қаюмзод, Муҳаммадиқболи Садриддин, Темур Варқӣ, Шоҳнаим Каримӣ, Илҳомҷон Ёқубзода дида мешуданд.
Тарафдорони мухолифин дар даст ягон шиор надоштанд, вале як-як пеши микрофони камера омада, Эмомалӣ Раҳмонро ба пешбурди сиёсатҳои диктаторӣ, саркӯби ҳуқуқи инсон ва озодиҳои демократӣ ва ғасби қудрат айбдор мекарданд.
Пас аз чанд лаҳза Эмомалӣ Раҳмонов ба Медеф мерасад ва мо пикети худро шурӯъ менамоем.
Publiée par Мухаммадикболи Садриддин sur Jeudi 7 novembre 2019