Шоми 7 ноябр як гуруҳи тарафдорони ҳаракати оппозитсионии феълан дар Тоҷикистон мамнӯи “Гурӯҳи 24” дар шаҳри Порис, пойтахти Фаронса бо кормандони хадамоти амнияти президенти Тоҷикистон Эмомалӣ Раҳмон муноқиша ва ҳатто дашномгӯиву занозанӣ кардаанд.
Муҳофизони президент ба пеши эътирозгарон баромада, аз эътирозгарон талаб кардаанд, ки пароканда шаванд, вале байни онҳо ва эътирозгарон аз “Гуруҳи 24” муноқиша бархоста, ба занозанӣ печидааст.
Ба гуфтаи эътирозгарон, дар пайи ин муноқиша ба маҳалли ҳодиса ҳудуди 50 корманди пулиси Фаронса ва мошини “Ёрии таъҷилӣ”-ро фиристодаанд ва кормандони пулис байни эътирозгарон ва аъзои ҳайъати ҳукумати Тоҷикистон сад шуда, эътирозгаронро дигар нагузоштаанд, ки ба макони мулоқоти Эмомалӣ Раҳмон наздик шаванд.
Салмон Холиқов, яке аз эътирозгарон дар тамоси кӯтоҳ ба сомонаи “Ахбор” хабар дод, ки муноқиша ва занозанӣ байни эътирозгарон аз “Гуруҳи 24” ва муҳофизони президент дар буриши Bosquet Avenu ва Rue de Grunelle дар наздикии истгоҳи метрои Ecole Militaiere дар мақоне рух дод, ки Эмомалӣ Раҳмон бо соҳибкорони фаронсавӣ мулоқот мекард.
Ба гуфтаи Салмон Холиқов, ба далоили амниятӣ макони ин мулоқотро тағйир доданд, вале ду нафар аз намояндагони “Гуруҳи 24” дар пайи ҷустуҷӯ мақони нави мулоқоти президенти Тоҷикистон бо соҳибкорони фаронсавиро пайдо кардаанд ва дар назди ин бино ба зидди сиёсатҳои ҳукумати ӯ шиор заданд.
Салмон Холиқов гуфт: “Муҳофизони президент баромада, бо нафарони мо вориди муноқиша шуданд. Дар ин байн мо ҳам расида омадем ва байнамон хеле дашномгӯиву ҳатто занозанӣ ҳам шуд. Ҳоло ба инҷо ҳудуди 50 корманди жандармерия (пулис)-и Фаронса ва мошини “Ёрии таъҷилӣ” фиристода шуданд ва жандармҳо моро ягон 50 метр аз муҳофизони президент дур андохта, дигар нагузоштанд, ки наздик шавем.”
Қайд карда мешавад, ки ҷониби ҳайъати расмии ҳукумати Тоҷикистон ин қазияро ҳанӯз расман шарҳ надодааст.
Намояндагони озодихоҳи тоҷик, ки асосан дар Аврупо амал мекунанд, аз пеш эълон карда буданд, ки дар он пойтахтҳои кишварҳои Аврупо, ки Эмомалӣ Раҳмон зимни силсиласафараш боздид мекунад, намоишҳои эътирозӣ ташкил мекунанд.
Эмомалӣ Раҳмон силсиласафараш ба Аврупоро рӯзи 4 ноябр аз Швейтсария оғоз кард ва рӯзи 5 ноябр тарафдорони “Гурӯҳи 24” дар шаҳри Берн, пойтахти амалии ин кишвар ба зидди сафари президенти Тоҷикистон нахустин пикети эътирозиашонро барпо карданд.
Шоми 7 ноябр як гуруҳи намояндагони Паймони миллии Тоҷикистон, як эътилофи нируҳои оппозитсияи тоҷик дар шаҳри Порис як гирдиҳамоии хурди эътирозии дигар низ доир карданд ва гуфтанд, ки дар рӯзҳои оянда эътирозҳои бузургтаре дар Порис барпо мекунанд.
Ин нахустин сафари президенти Тоҷикистон ба Аврупо дар се соли охир аст.