Насим Олимзода, вазири тандурустии Тоҷикистон имрӯз зимни ҷаласаи ниҳоди тобеяш аз супориши роҳбари дастгоҳи раисиҷумҳур дар бораи садақаи фитр хабар дод. Олимзода зимни ҷаласаи Вазорати тандурустӣ гуфт: “Тибқи супориши роҳбари Дастгоҳи иҷроияи раёсатҷумҳурии Тоҷикистон роҳбарон садақаи фитрро ҳамчун кӯмак бояд ба ашхоси эҳтиёҷманд, яккаву танҳо, ятимону бепарасторон, шахсони имконияташон маҳдуд, хона-интернатҳо ва дигар муассисаҳои соҳаи ҳифзи иҷтимоии аҳолӣ супоранд”.
Ин дар ҳолест, ки соли гузашта мақомот хоста буданд, ки садақаи фитр ба раисони маҳаллаҳо ва имомони масоҷид дода шавад, то онҳо ин маблағро ба ниёзмандон расонанд.
Шӯрои уламои Тоҷикистон соли равон садақаи фитрро мувофиқи меъёри шаръӣба ҳисоби гандум 5 сомонӣ ва ба ҳисоби мавиз 48 сомонӣ муайян кардааст, ки дуюмӣ ба шахсони тавони молияшон бештар рабт дорад.
Дар иттилоияи имсолаи Шӯрои уламо таъкид шудааст: “Бо дарназардошти вазъи кунунӣ ва паст намудани сатҳи камбизоатӣ садақаи фитр танҳо ба ниёзмандону маъюбон ва ятимон дода шавад”.
Садақаи фитр одатан пеш аз Иди Фитр дода мешавад. Моҳи Рамазон 30 рӯз, то 4 июн давом хоҳад дошт ва 5-уми июн дар Тоҷикистон Иди Фитр ҷашн гирифта хоҳад шуд.