Шарофиддин Гадоев, роҳбари ҷунбиши “Ислоҳот ва рушди Тоҷикистон” ва яке аз мухолифини сарсахти ҳукумати Тоҷикистон, дар шоми 5-уми март, пас аз 4 рӯз аз бозгашташ ба Аврупо нахустин бор дар бораи ҷузъиёти қазияи худ сӯҳбат кард.
Ба гузориши Тоҷик Пресс, Гадоев дар як паёми видеоӣ тасдиқ кард, ки ӯро мақомоти Тоҷикистон аз Русия дуздида ва бо маҷбурӣ ба Тоҷикистон бурданд. Вай видеоҳое, ки вай дар Душанбе дар он нақш бозӣ кардаастро “филмҳои сохта” номбар карду гуфт, рӯзи 7-уми март дар як нишасти хабарӣ дар пойтахти Ҳолланд ҷузъиёти боздошт ва зиндагии чанд рӯзааш дар Тоҷикистонро бо мардум дар миён хоҳад гузошт.
Шарофиддин Гадоев дар оғози паёми видеоияш, ки шоми 5 март аз ҷониби Паймони миллӣ – эътилофи нирӯҳои оппозитсияи тоҷик дар Ютуб нашр шуд, ба якояки онҳое, ки дар раҳоии ӯ аз боздошт дар Тоҷикистон саҳм гузоштанд, аз ҷумла ба мақомот ва парлумони Шоҳигарии Ҳолланд, сафоратҳои Олмону Амрико ва намояндагиҳои САҲА ва Иттиҳоди Аврупо дар Тоҷикистон, созмонҳои ҳомии ҳуқуқ, ҷомиаи шаҳрвандӣ, хабарнигорон ва дигарон изҳори сипос кард.
Шарофиддин Гадоев дар ин паём тасдиқ кард, ки ӯро ғайриқонунӣ аз Русия рабуда, маҷбуран ба Тоҷикистон бурдаанд. Ӯ аз ҷумла қазияашро”қазияи дуздида шудани ман аз шаҳри Маскав”номид.
Гадоев раҳоияшро натиҷаи мубориза дастаҷамъона номид ва гуфт: “Ҳамин иттифоқ маро озод кард, вагарна ман дар асорати онҳо мемондам ва дар он асорат имрӯз онҳо чизе мехостанд, болои ман мекарданд. Вале ин заҳмати якояки шумо буд, ки ман озод шудам. Ва ман пеши ҳамагии шумо сари таъзим фуруд меорам ва ташаккур мегӯям.”
Шарофиддин Гадоев дар идомаи суҳбаташ гуфт, ҳарчанд озод шуд, вале худро пурра озод эҳсос намекунад: “Чунки даҳҳо ва садҳо зиндоние, ки дуздида овардаанд аз Русия ва кишварҳои дигар, маҷбуран оварданд, онҳо дар зиндонҳои Раҳмонов қарор доранд, онҳо озод нестанд. То он зиндониёни сиёсӣ, ба мисли Маҳмадрӯзӣ Искандаров, Зайд Саидов, Бузургмеҳр Ёров, Мақсуд Иброҳимов, Муҳаммадалӣ Ҳаит ва даҳҳову садҳо зиндонии дигари сиёсӣ аз зиндонҳои Тоҷикистон озод нашаванд, ман худамро пурра озод эҳсос намекунам. Барои онки ҳар кадоми мо метавонем фардо дар ҷои онҳо қарор бигирем.”
Ӯ гуфт, мардум танҳо бо иттифоқ метавонанд, бар зулм пирӯз шаванд. Гадоев афзуд, “Ватан Тоҷикистон хонаи ҳар яки мост, хонаи азизи ҳар яки мост, хонаи муқаддаси мост, вале ин хонаи муқаддаси мо, хонаи азизи мо имрӯз дар дасти нафароне қарор дорад, ки миллати тоҷикро, давлати тоҷикро шармандаву шармсору сархам кардаанд.”
Шарофиддин Гадоев гуфт, рӯзи панҷшанбе, 7 март, соати 15 дар дафтари созмони байналмилалии Human Rights Watch дар шаҳри Амстердами Ҳолланд дар бораи ҷузъиёти қазияаш муфассалтар суҳбат хоҳад кард: “Дар мавриди инки чӣ гуна ман дуздида шудам, чӣ гуна аз Маскав ба Тоҷикистон, ба Душанбе оварда шудам, киҳо ва бо кадом роҳҳо маро дуздиданд, ва чӣ гуна маро дуздиданду чӣ гуна болои ман шиканҷа карданд, ят гуна болои ман филмҳо сохтанд ва режиссёрҳои инҳо кӣ буданд?, ман рӯзҳои наздик тариқи расонаҳо ба мардуми шарифи Тоҷикистон мерасонам, ки чӣ гуна як ҳукумат даст ба ҷинояти байналмилалӣ задааст?”