Мақомоти Тоҷикистон видеои Шарофиддин Гадоев, яке аз роҳбарони мухолифинро, ки субҳи 15 феврал ба Тоҷикистон баргашт, нашр кард. Дар ин видеои тақрибан 14-дақиқагӣ Шарофиддин Гадоев мегӯяд, ки ихтиёран ба Ватан баргаштааст. Гадоев мегӯяд, ки баъди бозгашташ пешрафтҳои Тоҷикистонро ба чашм дид ва аз ҳама ҳамсафонаш даъват мекунад, ки мисли ӯ ба Ватан баргарданд. Ӯ гуфт, бо кумаки ВКД ба Тоҷикистон баргаштааст ва муносибати роҳбарони ин вазорат нисбат ба ӯ хеле хуб буд ва ягон шиканҷаву зӯроварӣ нисбаташ нашудааст. Гадоев гуфт, дар хориҷ зери таъсири Муҳиддин Кабирӣ монда буд, ки воқеъиятҳои кишварро ба онҳо нодуруст мефаҳмонд ва гумроҳашон мекард. Шарофиддин Гадоев гуфт, ки дар роҳи муборизаҳояш хато кардааст, вале умед дорад, ки ӯро мебахшанд.
Пеш аз баёноти Гадоев Шврофиддин раиси ПМТ, раҳбари созмони Ислоҳот ва рушд дар Тоҷикистон ва узви аршади Паймони миллӣ аз тарафи мақомоти амниятии Тоҷикистон рабуда шудааст.
Муҳиддин Кабирӣ гуфт “ҳарчанд мақомоти Тоҷикистон эълон карданд, ки Шарофиддин бо ихтиёри худаш баргаштааст, тамоми шавоҳид ва далелҳо далолат ба ин мекунанд, ки ӯ рабуда шудааст”.
Ӯ изҳор дошт бори аввал нест, ки амали ноҷавонмардонаи дуздии мухолифону фаъолони сиёсӣ аз тарафи мақомоти Тоҷикистон сар мезанад. Аз ҷума ӯ аз Эҳсон Одинаев, Мақсуд Иброҳимов ва кушта шудани Умаралӣ Қувватов ёд кард.
Раиси ПМТ зикр кард ҳукумати Тоҷикистон дар сатҳи ҷаҳонӣ як шабаки ҷиноятиеро ташкил кардааст, ки кораш дуздидан, куштан ва ғорат кардани мардум аст. “Албатта ҳеҷ ҳукумати қонунмеҳваре дар ин амалҳои ҷиноятӣ бо онҳо ҳамкорӣ намекунад. Ин аст, ки онҳо ҷенеролҳо, афсарон ва кормандони фасодзадаи ниҳодҳои кишварҳои дигарро бо додани пора ҷалб мекунанд. Ин пулҳое, ки ба он ҷинояткорон пардохт мешавад, аз ҳисоби буҷаи кишвар ва ҷайби мардум аст” — гуфт Муҳиддин Кабирӣ.
Раҳбари Паймон эътироф кард, ки барои Паймони Миллӣ ва ҳаракатҳои мубориз, худи ӯ ва хонаводаи Шарофиддин аз даст додани чунин муборизе, ки хеле инсони самимӣ буд кори саҳле нест ва зарбаи гароне ба баданаи мубориза аст.